Zanga-zangar neman ficewar sojojin Amurka daga arewacin Nijar

Dubban jama'a a Jamhuriyar Nijar sun gudanar da zanga-zangar neman ficewar sojojin Amurka daga arewacin kasar a jiya Asabar, bayan da gwamnatin mulkin soja a Yamai ta ce ta janye daga yarjejeniyar soji da ta kulla da Amurka.

Shugaban mulkin sojin Jamhuriyar Nijar Janar AbdurRahmane Tiani tare da mukarrabansa a birnin Yamai. REUTERS - STRINGER

Rahotanni daga birnin na Yamai,na nuni cewa dalibai da wasu daga cikin manyan jami'an gwamnatin soji na daga cikin mutanen da suka taru a gaban hedikwatar majalisar dokokin kasar da ke birnin Yamai.

Dubban matasa a Yamai babban birnin Jamhuriyar Nijar © AP - Sam Mednick

Korar dakarun kasashen waje,ba wani sabon abu ba ne a Nijar, an kori sojojin Faransa a karshen shekarar 2023, yanzu haka kusan sojojin Amurka 1,000 ne suka kasance a garin Agadez da ke arewacin kasar.