Ghana da Najeriya za su fafata kan tikitin zuwa Qatar a Maris

Hukumar kwallon kafar Najeriya NFF, ta ce tawagar ‘yan wasan kasar ta Super Eagles za su fafata da takwarorinsu na Ghana a wasan neman tikitin. zuwa gasar cin kofin duniya da kasar Qatar za ta karbi bakunci, a filin was ana MKO Abiola da ke birnin Abuja.

Babban filin wasa na Al-Rayyan da ke kasar Qatar, wanda zai karbi bakuncin wasannin gasar cin kofin duniya ta shekarar 2022. - AFP

Sanarwar ta NFF ta ce za a yi wannan karawar ce a ranar 27 ga watan Maris.

A halin yanzu ana dakon sanarwa daga hukumar kwallon kafar Ghana, kan zagayen farko na wasan neman cancantar da za su buga, wanda ake sa ran ya gudana ko dai a ranar 23 ga watan na Maris ko kuma a ranar 24 ga watan.

Baya ga wasan Najeriya da Ghana, Jadawalin wasannin neman tikitin halartar gasar cin kofin Duniya da za ta gudana a Qatar ya nuna cewa Masar da Senegal za su sake kece raini a cikin watan Maris, inda kowace kasa za ta yi tattaki zuwa gidan abokiyar hamayyarta.

A sauran wasannin neman tikitin zuwa gasar ta cin kofin duniya a Qatar, Kamaru za ta kara da Algeria, Mali da Tunisia, sai kuma Jamhuriyar Dimokaradiyyar Congo da za ta fafata da Morocco.