NNPC zai yi maganin barayin mai

Kamfanin mai na NNPC a Najeriya ya bayyana cewa zai fara amfani da jiragen da ke tuka kansu domin sa ido ga shige da ficen jiragen ruwa da ke dakon fetir a kasar.

Ginin Kamfanin NNPC a Najeriya RFI

Shugaban Kamfanin Ibe Kachikwu ne ya bayyana daukar matakin a lokacin da ya ke gabatar da jawabi a wani taron Gulf Guinea a Abuja.

Kachikwu ya ce za su yi maganin barayin fetir da fasa butun mai ta hanyar amfani da jirage masu tuka kansu a iyakokin ruwan Najeriya.

Kuma Shugaban Kamfanin ya ce nan da ‘yan watanni ne suke fatar soma aiwatar da matakin.

A cewarsa, tsakanin watan Yunin 2014 zuwa 2015 an kai wa bututun mai kusan 4,000 hari a sassan Najeriya, kuma kimanin mutane 350 aka kashe da suka hada da ma’aikatan Mai da ‘Yan sanda da kuma mutanen yankin Neja Delta.