'Yan Tawayen Yemen Sun Saki Mutane 276

‘Yan tawayen Shia na Houthi a kasar Yemen sun sanar da sakin wasu mutane 276 magoya bayan Gwamnati da ake tsare da su na tsawon watanni.

Wani yaro ya yi nasarar samun kayan abinci na agaji a Yemen REUTERS/Khaled Abdullah

Shafin ‘yan tawayen na Yanar Gizo na cewa mutane 200 suka saki a garin Rada dake tsakiyar gunduman Baida, sannan kuma aka saki wasu mutane 76 daga gunduman Dhamar.

Su mutane 200 da aka saki a garin Rada an tsare su ne saboda zargin suna neman bada goyon baya ga sojan karo-karo na kasashen Larabawa dake yakar ‘yan tawayen, yayinda mutane 76 da aka saki daga Dhamar an tsare su ne saboda zargin suna baiwa Gwamnatin kasar hadin kai.