Super Eagles ta rikito zuwa matsayi na 40 a duniya a jadawalin FIFA

Tawagar Najeriya ta fuskanci komawa baya da matsayi biyar a jadawalin FIFA na Maza a watan Fabrairu.Super Eagles, wacce ta kasance ta 35 a duniya a jadawalin da aka fitar a watan Disamba, ta rage maki 14 zuwa mataki na 40.

Tawagar 'yan wasan Najeriya ta Super Eagles REUTERS/Dylan Martine

Koma bayan da Eagles ta fuskanta ya samo asali ne saboda rashin tabuka abin kirki da su ka yi a wasan neman tikitin shiga gasar cin kofin Afrika da suka yi da kasar Guinea-Bissau mara karsashi sosai a sabgar tamola a cikin watan da ake nazarin bada makin.

Wild Dogs sun yi galaba a kan ‘yan wasan Super Eagles a wasan farko cikin karawa biyu a filin wasa na Moshood Abiola da ke Abuja kafin su rama da ci 1-0 a Bissau a wasa na biyu.

A jadawalin matakin na maza da FIFA ta fitar ranar 22 ga watan Disambar, 2022 Eagles ta kammala a matsayi na 35, sun sauka da mataki daya a lokacin. A Afirka Najeriya ta rikito zuwa na 6.

Morocco ta daya a Afirka

Morocco ta ci gaba da zama ta daya a nahiyar kuma ta 11 a duniya. Sai kuma Senegal mai matsayi na biyu, wacce ita ma ta koma na 18 a duniya.

Tunisiya ta ci gaba da rike matsayinta na uku a Afirka kuma ta 28 a duniya, yayin da Algeria ta sha gaban Masar ta zama ta hudu a Afirka yayin da ta kara mataki 6 zuwa matsayi na 34. Masar wadda ta kasance ta 39 a matsayi na baya-bayan nan, ta kaka mataki hudu inda ta zama ta 35 a duniya sannan ta biyar a Afirka.

Najeriya da Kamaru da Ivory Coast da Mali da Ghana na cikin kasashe 10 na farko a Afirka.

Argentina ta daya a duniya

Kasar Argentina da ta lashe gasar cin kofin duniya ta sake komawa saman teburin jadawalin a karon farko cikin shekaru shida.

Tawagar Lionel Scaloni - wacce ta lashe kofin duniya na uku da nasara mai ban sha'awa a wasan karshe da Faransa a Qatar a bara - ta samu nasara a wasannin sada zumunta da Panama da Curacao a watan Maris.

Argentina ta maye gurbin abokiyar hamayyarta Brazil a, bayan da Selecao ta yi rashin nasara a wasan sada zumunci da Morocco wadda ta kai wasan dab da na kusa da karshe a gasar cin kofin duniya a watan Maris, abin da ya sa ta koma mataki na uku.

Faransa ta biyu

Faransa ce ta biyu bayan da ta doke Netherlands da Jamhuriyar Ireland a gasar neman cancantar shiga gasar Euro 2024 yayin da Selecao ta koma matsayi na uku.

Belgium, Ingila, Netherlands, Croatia, Italiya, Portugal, da Spain ne ke cikin goma.