Chelsea da Arsenal sun sha kashi, Messi zai wuce Mueller

Saura kwallo daya kacal Messi ya kamo kafar Gerd Mueller a matsayin wanda ya fi kowa zira kwallo a raga a kakar wasa, domin a karshen mako Messi ya zira kwallaye Biyu cikin wadanda suka zirawa Barcelona kwallaye 5 a ragar Athletic Bilbao.

Kocin Chelsea Rafa Benitez ya ware hannaye yana magana da 'Yan wasan shi a lokacin da suka sha kashi hannun West Ham a wasan Premier REUTERS/Andrew Winning

Muller na Jamus shi ne wanda ya zira kwallaye 85 a raga a kakar wasan 1972. Kuma yanzu Messi na Argentina yana neman karya tarihin shi.

A karshen mako, Real Madrid kuma ta doke Makwabiciyarta ne Atletico Madrid ci 2-0. Wanda ya ba Real Madrid nasarar kwace maki Uku hannun atletico Madrid domin rage yawan makin da ke tsakaninsu a Teburin La liga.

Tazarar maki 11 ne dai Barcelona taba Real Madrid da ke a matsayi na uku kasan Atletico Madrid da ke a matsayi na biyu.

Faransa

A karshen mako, kungiyar Lyon ce ta dare Tebur bayan doke Montpelier mai rike da kofin league din kasar ci 1-0.

PSG kuma ta sha kashi ne hannun Nice ci 2-1 Kamar yadda Kungiyar Marseille ta kwaci kanta hannun Brest ci 2-1.

Ingila

Rafeal Benitez ya sha kashi a karshen mako a wasan da West Ham ta casa Chelsea ci 3-1.

Benitez wanda ya gaji Di Matteo ya buga wasanni uku ba tare da samun nasara ba. kuma yanzu tazarar maki 10 ne Manhcester United taba Chelsea a teburin Premier.

A karshen mako dai Manhcester United ta sha da kyar ne a hannun Reading ci 4-3.
Manchester city kuma da Everton sun yi kunnen doki ne ci 1-1.

Kungiyar Liverpool kuma ta hauro zuwa matsayi na 11 bayan samun nasarar doke Southampton ci 1-0

Kungiyar Arsenal kuma ta sha kashi ne a hannun Swansea ci 2-0. Dan wasan Swansea Michu shi ne ya zira kwallayen guda biyu

Jamus

A Bundesliga, wasa tsakanin Bayern Munich da Borussia Dortmund an tashi ne kunnen doki ci 1-1. Hakan ne kuma yanzu ya rage yawan makin Bayern Munich a Tebur zuwa maki 8.

Karo na hudu ke nan Bayern Munich ba ta samu galabar Borussia Dortmund ba. amma a karshen mako Toni Kroos shi ne ya fara zirawa Bayern kwallo a raga daga bisani kuma Mario na Dortmund ya barke kwallon.

Tazarar maki 11 ne Bayern ta ba Borussia Dortmund a teburin Bundesliga. Bayer Leverkusen ce a matsayi na biyu wacce ta doke Nuremberg ci 1-0.

Rasha

Kungiyar Anzhi Makhachkala ta doke CSKA Moscow ci 2-0, kuma wannan ne ya karya lagon CSKA Moscow a bana wacce ta buga wasanni bakwai ba tare da samun galabarta ba.

CSKA da Anzhi sune a saman Teburin Premier na kasar Rasha da maki 40 bayan buga wasanni 18.

Mai rike da kofin gasar Zenit St Petersburg ita ce matsayi na uku da maki 37.