Amurka ta sake kaddamar da sabon farmaki a Yemen

Amurka ta sake kaddamar da wani sabon farmaki a Yemen biyo bayan shan alwashi da Joe Biden ya yi na kare jiragen ruwan dakon kaya da ke ratsa tekun Bahar Maliya. 

Wani jirgin ruwan a tekun bahar maliya AP - LPhot Belinda Alker

Harin na zuwa ne kwana guda bayan makamancinsa da Amurka da takwararta Birtaniya suka kaddamar a kan jiragen yakin dakarun Houthi dake kan tekun, lamarin da ke kara jefa fargabar cigaba da yaduwar rikicin Isra’ila a gabas ta tsakiya.

Wannan na zuwa ne bayan hare-hare kan jiragen kasashen da mayakan na Houthi suka kai don jadadda barazanar su ta hana kaya shiga Isra’ila ta tekun, matukar bata dakatar da ruwan wutar da take yi a Gaza ba.

Ganau sun shaida wa manema labarai cewa kasashen sun yi amfani da bama-bamai wajen kai wa jiragen mayakan Houthi hari a kan gabar tekun Maliya ta Hodeidah da kuma gab da sansanin soji na Hajja.

Tun a jiya juma’a ne dubban mutane suka gudanar da zanga-zanga a birane da dama na kasar Yemen, don nuna bacin rai dangane da hare-haren da jiragen yakin Birtaniya da Amurka suka kai wa cibiyoyin mayakan kungiyar Houthi da ke rike da madafan iko a kasar. 

Tuni dai Iran ta yi Allah wadai da wannan hari tana mai kwatanta shi da tsokanar fadan da zai mamaye yankin gabas ta tsakiyta.