Kasashen Duniya sun gana ta kafar Intanet dangane da canjin yanayi

Wakilan kasashen duniya sun gana ta kafar Intanet domin fara nazari kan wata yarjejeniyar wucen-gadi, gabanin  babban taron su kan matsalar sauyin yanayi da aka jinkirta saboda annobar Korona,.

Canjin yanayi a Duniya REUTERS - Gonzalo Fuentes

Kimanin kasashen duniya 195 suka halarci  ganawar ta kafar Intanet wadda ita ce  irinta ta farko tun bayan da Majalisar Dinkin Duniya ta fitar da  yarjejeniyar wucen-gadin a cikin watan Yuli, yayin da kasashen za su ci gaba da nazartar yarjejeniyar har nan da  ranar 3 ga watan Satumba mai zuwa.

Canjin yanayi AP - David Goldman

Wannan yarjejeniya dai, ta bukaci kare akalla kashi 30 na doran kasa da tekuna da kuma sauran tsirrai da dabbobi.

Yarjejeniyar ta fayyace wa bil’adama tsarin da zai bi wajen tabbatar da zaman lafiya tsakaninsa da sauran halittu nan da shekarar 2050, yayin da ta zayyana wasu kudurori da ake fatan cimma su nan da shekarar ta 2030 domin kare muhallin tsirrai da dabbobi.

Canjin yanayi ya haifar matsaloli a kasashen Duniya Marco Bertorello AFP

Kodayake har yanzu, kungiyoyin masu rajin kare  dabbobi da  muhalli na duniya na ci gaba da neman alfarma daga hukumomin duniya don ganin sun  tsaurara manufofin da yarjejeniyar ta kunsa da suka hada da bukatar bullo da wani tasri da zai hana sake barkewar annobar Coronavirus.

Mataimakiyar shugaban Kungiyar Wildlife Conservation Society, Susan Lieberman ta shaida wa kamfanin dillancin labarai na AFPC cewa, ko kadan wannan yarjejeniya ba ta tabo batun Korona ba.