An Kashe wani jigon Kungiyar Khorasan ta Syria

Hukumomin Kasar Amurka sun bayyana cewa an kashe Bafaranshen nan da ake zargi da kera wa Mayakan Kungiyar Khorasan mai alaka da Al-Qaeda Bama bamai.

A baya dai an zaci Bafaranshen ya mutu AFP PHOTO / MOHAMMED HUWAIS

A jiya jumma’a ne Hukumomin suka sanar da mutuwar David Drugeon sakamakon hare haren saman da Rundunar hadin gwiwa ta kai a Syria.

A baya dai Amurka ta zaci an Kashe Drugeon tun a watan Nuwamban bara amma daga bisani ta fahimci yana raye.

To sai dai a wannan karan hatta mayakan jihadi na Saudiya sun sanar da mutuwar Bafaranshen a shafin sada zumunta na Twitter, inda suka ce ya yi shahada.