Shugaban Mexico ya amince a binciki dukiyar shi

Shugaban kasar Mexico Enrique Pena Nieto ya sanar da bayar da umarnin a binciki manyan gidajen da ya mallaka da na matarsa da Ministan kudin kasar, domin sanin ko daga hannun ‘yan kwangila ya same su.

Shugaban kasar Mexico Pena Nieto REUTERS/Tomas Bravo

Shugaban wanda ya ke fuskantar matsin lamba daga mutan kasar game da gidajen kasaita da ya mallaka, ya musanta rashin gaskiya wajen mallakan gine-ginen da ya ke da su.

Ita kanta matarsa kafofin yada labaran kasar sun ruwaito cewa ta saye wasu gine-gine na kece raini a Mexico, da ake ganin ba da guminta ta sami kudin ba.

Ana dai zargin Shugaban kasar da matarsa da Ministan kudi sun karbi toshiyar baki daga hannun wasu kamfanin kasar China.