WHO za ta fara gwajin rigakafin cutar Ebola a Uganda

Shugaban Hukumar Lafiya ta Duniya Tedros Adhanom Ghebreyesus ya ce nan da makwanni za a fara gudanar da gwaje-gwaje kan allurar rigakafin cutar Ebola domin dakile yaduwar cutar wadda ta barke a kasar Uganda.

Likitoci kenan, lokacin da suke shiga cibiyar killace masu fama da cutar Ebola da ke Mubende, Uganda. AP - Hajarah Nalwadda

A watan da ya gabata ne Kampala ta sanar da samun mace-mace na farko a Uganda daga cutar mai saurin yaduwa, karon farko tun shekarar 2019, inda wata sanarwa da hukumar ta WHO ta fitar ta ce gwaji ya tabbatar da samun cutar a jikin mutum 54 da kuma mutuwar mutane 19.

Ministar lafiya ta kasar Uganda Jane Ruth Aceng ta shaidawa kamfanin dillancin labaran Faransa na AFP cewa an samu mutuwar mutum guda a birnin Kampala bayan ya tsere daga tsakiyar gundumar Mubende inda aka fara samun bullar cutar.

A halin yanzu babu wani maganin rigakafin cutar Ebola nau’in Sudan da ke yaduwa a gabashin Afirka.

An dai fara samun bullar cutar ne ranar 20 ga watan Satumba, a yankuna biyar da suka hada da Mubende, a cewar WHO.

Wani bincike da hukumar lafiya ta duniya WHO ta gudanar ya gano cutar Ebola nau’in Sudan na barazanar yaduwa zuwa makwabtan kasashe saboda zirga-zirgar kan iyaka tsakanin Uganda da wasu kasashe.

Annobar mafi muni a yammacin Afirka ta auku ne tsakanin shekarar 2013 zuwa 2016 inda ta kashe mutane fiye da 11,300.

Uganda ta fuskanci bullar cutar Ebola da dama, na baya-bayan nan shine na shekarar 2019 inda akalla mutane biyar suka mutu.