MDD ta bukaci Jammeh ya mika mulki

Kwamitin tsaro na Majalisar Dinkin Duniya ya bukaci shugaban Gambia, Yahya Jammeh da ya mika nulki ga Adama Barrow da ya yi nasara a zaben da aka gudanar a farkon watan Disamba.

Shugaban Gambia Yahya Jammeh ya yi amai ya lashe, in da ya ki amincewa da shan kayi a zaben shugabancin kasar da aka gudanar a farkon watan Disamba REUTERS/Thierry Gouegnon

Wannna na zuwa ne bayan Jammeh ya sanar da kin amincewa da shan kayi, in da ya zargi jami’an hukumar zaben kasar da tafka kura-kurai.

Wata sanarwar da mambobin kwamitin 15 suka fitar, ta bukaci Jammeh da ya mutunta muradun ‘yan kasarsa kamar dai yadda ya yi a ranar 2 ga watan Disamban, in da ya amince da shan kayi.
 

Ministan harkokin wajen Senagal ne, Mankeur Ndiaye ya bukaci kwamitin tsaron da ya tsoma baki cikin lamarin.

A bangare guda, shugaban Jammeh ya hana jirgin shugabar kungiyar kasashen ECOWAS kuma shugabar kasar Liberia Ellen Johnson Sirlef sauka a cikin kasarsa, yayin da ya girke jami’an tsaro akan tituna.

Zababben shugaban kasar, Adama Barrow ya yi kira ga al'ummar kasar da su kwantar da hankulansu.