Griezmann yayi nadamar kin amsa tayin Barcelona - L'Équipe

Jaridar labarin wasanni ta L’ Equipe da ke Faransa ta rawaito cewa, dan wasan gaba na Atletico Madrid, Antione Griezmann ya soma kokarin sauya sheka zuwa Barcelona a karshen kakar wasa ta bana.

Dan wasan gaba na Atletico Madrid Antoine Griezmann. Federico Gambarini / AFP

Rahoton ya ce wata majiya ta kusa da Griezmann ta bayyana cewa, dan wasan yayi nadamar yin watsi da tayin Barcelona na komawa gareta a farkon kakar wasa ta bana.

A shekarar bara, rahotanni suka tabbatar da cewa, Griezmann na gaf da komawa taka leda a Barcelona, amma daga bisani sai dan wasan ya sauya shawara, inda ya kara wa’adin yarjejeniya da kungiyarsa ta Atletico har zuwa shekarar 2023.