Matukin motar da aka yiwa wata daliba fyade a India ya rataye kansa a gidan yari

Matukin motar da akawa wata daliba fyade a kasar India wanda hakan ya yi sanadiyar mutuwar ta daga baya, ya kashe kansa a dakin gidan yarin da yake tsare,a yayin da ‘Yan uwansa ke ikrarin kashe shi aka yi. Ram Singh ya kasance daya daga cikin mutane shida da ake zargi a bisa aikata wannan aika-aika, an kuma same shine a mace kamin wayewar gari, inda ‘Yan Sanda suka bayyana cewa Singh ya rataye kansa ne a gidan yarin Tihal, dake birnin Delhi.  

Motar dake dauke da wadanda ake zargi da yin fyade ga wata daliba, akan hanyarsu ta zuwa gidan yari REUTERS/Stringer

“Ya yi amfani da kayan jikinsa ne, inda ya hadasu ya daura sannan ya rataye kansa a rufin dakin bayan ya taka wata kujerar katako.” Inji wani Jami’in gidan yarin.

Sai dai mahaifin yarinyar da akwa fyade, wadda ‘yar shekaru 23 ce, ya bayyana cewa akwai sakaci a bangaren jami’an dake tsaron gidan yarin.

“Mun kasa gane ko menene ya sa ‘Yan sanda suka kasa kare shi, sun san cewa shi ne mutumin da aka fi zargi a wannan aika-aika da akawa ‘ya ta.”

Mahaifiyar Singh ta ce ta kadu matuka bayan da ta sami labarin mutuwar dan ta.

A watan Disambar bara ne aka wa dalibar fyade aka kuma mata duka tare da saurayinta a cikin wata mota kirar Bas, inda kuma ta rasu a ran 29 ga watan Disambar bayan an yi fafutukar ceto ranta a wani asibiti dake Singapore.

Fyaden, wanda ya jawo bore a sassa daban daban na kasar ta India ya haskaka kasar a matsayin kasa da bata mayar da hankali wajen kare hakkin mata ba, ganin yadda ake samun yawaitar yiwa mata fyade.