Djokovic ya sha kashi wasan karshe na Paris Masters

Matashin dan wasa an kasar Denmark Holger Rune  bya bai wa Novak Djokovic mamaki a wasan karshe na gasar Paris Masters, inda ya lashe kofin a karon farko a sana’arsa.

Holger Rune (lhagu) ya doke mai rike da kofin, Novak Djokovic a gasar Paris Matsers. AP - Thibault Camus

Dan wasan mai shekaru 19 ya hana Djokovic taka rawar gaban hantsi, inda ya hana shi lashe kofin Masters na Paris karo na 7 ta wajen doke shi 3-6 6-3 7-5.

Yanzu ya kasance dan wasa mafi karancin shekaru da ya lashe wannan gasa ta Paris tun bayan da Boris Becker ya lashe a shekarar 1986.

Wannan  nasarar za ta kai Rune matsayi na 10 a jerin ‘yan wasan Tennis na duniya a karon farko idan aka wallafa sunayen ‘yan wasan a ranar Litinin din nan.

Djokovic ya taya matashin murna, inda ya ce yaro ne mai kuzari da sadaukarwa wanda ya cancanci nasarar da ya samu.