An yi zanga-zangar adawa da kama Puigdemont a Berlin

Daruruwan mutane ne suka shiga wata zanga zangar a  birnin Berlin na kasar Jamus domin bukatar ganin an saki shugaban 'yan awaren Spain, Carles Puigdemont wanda ake tsare da shi tun makon jiya.

Masu zanga-zangar adawa da tsare Carles Puigdemont a Berlin 路透社

Mutanen da ke dauke da tarin lema saboda ruwan saman da aka tafka, sun yi tattaki daga kofar Brandenburg zuwa ma’aikatar shari’a, dauke da rubuce-rubucen da ke bayyana cewar, a saki Puigdemont tare da fursunonin siyasar Catalonia.

Wasu daga cikin su kuma suna dauke da tutar Catalonia mai dauke da launin ruwan bula da ruwan dorowa da kuma ja.

Hukumomin shari’ar Jamus na nazari kan bukatar Spain na mika mata Puigdemont domin fuskantar shari’a.