'Yan Catalonia miliyan daya na zanga-zanga

Kimanin mutane miliyan daya ne suka yi fitar dango a birnin Barcelona da ke Catalonia, domin zanga zangar nuna rashin goyon baya kan ballewar yankin daga Spain.

Masu zanga-zanga a Barcelona, babban birnin yankin Catalonia yayin da suke tattakin nuna rashin goyon bayan ballewar yankin daga kasar Spain. 29 ga Oktoba, 2017. AFP

Masu zanga-zangar sun kuma nuna goyon baya kan matakin fara mulkar yankin kai tsaye da gwamnatin Spain karkashin Fira Minista Mariano Rajoy ta dauka, inda kuma suka bukaci a garkame tsohon shugaban na Catalonia a gidan yari, wato Carles Puigdemont wanda aka tsige.

Bayan shelar ballewa da majalisar Catalonia ta yi a Juma’ar da ta gabata, Fira Ministan Spain Mariano Rajoy, ya sanar da rusata, da kuma tsige shugaban yankin, inda ya bada umarnin shirya sabon zabe cikin watan Disamba mai zuwa.

A yau Lahadi, daya daga cikin ministocin kasar Belguim ya yi wa Puigdemont tayin bashi mafakar siyasa idan ya bukaci hakan.