Attajirin Faransa Pierre Bergé ya rasu yana da shekaru 86

Shahrarren dan kasuwar Faransa Pierre Bergé, wanda kuma ya shahra sakamakon bayar da dukiyarsa don gudanar da ayyukan jinkai a sassan duniya, ya rasu a wannan juma’a yana da shekaru 86, bayan da ya share tsawon shekaru yana jinya.

Pierre Bergé, shahrarren dan kasuwa kuma mai jinkai a Faransa, AFP/Stephane de Sakutin

Pierre Berge, wanda babban amini ne ga mai kamfanin dinka tufafin kasaita nan da ya yi suna a duniya wato Yves Saint Laurent, ya rasu ne ana sauran makonni kadan a kaddamar da wasu cibiyoyin ajiye kayayyakin tarihi masu nasaba da tarihin dinka tufafi guda biyu a kasar.

Ko baya ga kafa gidauniya da ke taimakawa da makuddan kudade domin yaki da cutar kanjamau a duniya, Pierre Berge na da hannayan jari a wasu kamfanoni da suka hada da jaridar Le Monde, yayin da ya kasance amini na kut-da-kut ga tsohon shugaban kasar Francois Mitterand.

Alkalumman sun tabbatar da cewa kadarorin da Berge ya mallaka shi kadai, da kuma wadanda ke cikin kamfanonin hadin-guiwa tsakaninsa da sauran abokannin kasuwancinsa, sun haura Euro milyan 200.

A shekarar 1994 ne Pierre Berge ya kafa kungiyar yaki da cutar kanjamau da ake kira Essemble conte le Sida, kafin daga bisani kungiyar ta canza suna zuwa Sidaction.