Melechon ya samu tagomashi a yakin neman zabensa

Biyu daga cikin jiga-jigan ‘yan takara a zaben shugabancin Faransa, Francois Fillon da Jean Luc Melechon sun gudanar da gagarumin yakin neman zabe a kokarinsu na ganin sun samu karin tagomashi daga magoya bayansu, yayin da zagayen farko na zaben  zai gudana a ranar 23 ga wannan wata na Aprilu.

Dan takarar shugabancin Faransa Jean-Luc Mélenchon a Maerseille REUTERS/Jean-Paul Pelissier

An dai dauki tsawon makwanni kuri’ar jin ra’ayin jama’a na nuna dan takara mai zaman kansa Emmanuel Macron da mai ra’ayin kishin kasa Marine Le Pen a matsayin wadanda ke kan gaba wajen samun mogya baya tsakanin ‘yan takara 11 da za su fafata a zaben shugabancin kasar.

To sai dai kuma wani sakamakon kuri’ar jin ra’ayin jama’a da aka fitar a baya-bayan nan nuna cewa Macron da Le pen a yanzu na fuskantar kalubale idan aka yi la’akari da tagomashin da dan takara Jean Luc Melenchon ke samu, in da a yanzu ya samu karin magoya baya da kashi 4 zuwa kashi 19, dai dai da tsohon Firaministan kasar kuma dan takara a yanzu wato Francois Fillon, wanda tauraruwarsa ta dusashe sakamakon bincikensa da ake bisa zargin biyan matarsa Penelope Fillon makudan kudade a matsayin albashi da ba ta cancanci karbarsu ba, sai kuma batun daukar ‘ya‘yansa masu karancin shekaru aiki a lokacin da ya ke rike da mukamin Firaminsta, matakin da ya saba wa dokar Faransa.

A wani lamarin kuma da masu iya magana kan ce ba a san maci tuwo ba sai miya ta kare, wasu daga cikin masu sharhi na da ra’ayin cewa ya yi wuri a iya hasashen wanda ka iya lashe zagayen farko a zaben shugabancin Faransa, idan aka yi la’akari da sakamakon wata kuri’ar jin ra’ayi da aka fitar a watan da ya gabata da ke nuna har yanzu kashi 38 daga cikin al’ummar kasar ba su bayyana dan takarar da suke mara wa baya ba.