'Yan sanda sun tarwatsa masu bore a Brussels

‘Yan sandan Belgium sun yi amfani da ruwan zafi da kuma hayaki mai sa kwalla domin tarwatsa wata zanga-zanga da masu zazzafar kishin kasa suka gudanar a birnin Brussels domin nuna bacin ransu a game da harin ta’addancin da aka kai wa kasar a makon jiya.

Jami'an tsaron Belgium sun tarwatsa taron masu zanga zangar ta hanyar jefa masu hayaki mai sa kwalla. REUTERS/Jacky Naegelen

Wasu matasa ne da aka ce yawansu ya haura dari biyu, suka yi wannan zanga-zanga a daidai lokacin da jama’a ke juyayi don tunawa da wadanda suka rasa rayukansu sakamakon hare-haren ta’addanci da aka kai birnin na Brussels da kuma Paris da ke makociyar kasar wato Faransa.

Tarzomar ta kazance ne a lokacin da matasan suka fara jifar ‘yan sanda da duwatsu yayin da wasu ke cinna wuta a kwalaben da aka makare su da man fetur domin jefa wa ‘yan sanda, to sai dai majiyoyin tsaro sun ce, an cafke akalla 10 a wannan zanga-zangar.

Kafin nan dai mai shigar da kara na gwamnatin tarayyar Belgium, ya ce ana ci gaba da bincike domin gano sauran mutanen da ke da hannu a hare-haren da aka kai wa kasar a ranar Talatar da ta gabata, inda ya ce, an kai samame har sau 13 a wurare daban daban kuma an cafke mutane 4 da ake zargi.

A can kuwa kasar Italiya, jami’an tsaro sun sanar da kama wani dan kasar Algeria da ake zargi da hannu a batun na Belgium, to sai dai majiyoyi sun ce, wanda ake zargin mai suna Djamalud Dine Ouali mai shekaru 40, ya ki cewa jami’an tsaro uffan.