Jam’iyyar Sarkozy ta yi tir da tsoffin Ministocinta a Faransa

Jam’iyyar UMP ta shugaba Nicolas Sarkozy, ta soki wasu Tsoffin ministocinta, wadanda suka bayyana ba zasu zabi Shugaban ba a zabe mai zuwa bayan bayyana kudirin nuna goyan bayansu ga Dan takarar adawa Francois Hollande.

Shugaban kasar Faransa Nicolas Sarkozy Dan takarar Shugaban kasa karkashin Tutar Jam'iyyar UMP REUTERS/Gonzalo Fuentes

Jam’iyar ta bayyana ministoci a matsayin maciya amana, wadanda bai kamata a sake amincewa da su ba.

Shugaba Sarkozy yanzu haka yana fuskantar kalubale game da zabensa wa’adi na biyu a zaben shugaban kasa da za’a gudanar a karshen mako, domin mutane da dama suna kaurace masa, cikinsu har da ‘yayan Jam’iyarsa, da kuma Tsohon shugaban kasar da ya gada, Jacques Chirac.

Sakamakon ra’ayoyan Jama’a da aka gudanar a kasar sun nuna Sarkozy zai sha kaye a zaben, kodayake sakamakon ya nuna shugaban zai iya lashe zagaye na farko amma Hollande babban mai adawa da shi na Jam’iyyar gurguzu shi zai lashe zagaye na biyu.