Taliban ta haramta yi wa mata auren dole a Afghanistan

Kungiyar Taliban ta kafa dokar haramta yi wa mata auren dole a Afghanistan, tana mai cewa bai kamata a dauki matan a matsayin kadara ba, dan haka dole ne su amince da zabin wanda ake shirin aura musu.

Wasu mata a Kaboul babban birnin kasar Afghanistan. AP - Mariam Zuhaib

Shugaban kungiyar Taliban Hibatullah Akhunzada, da ake kyautata zaton yana kudancin birnin Kandahar ne ya sanar da kafa dokar hana auren dolen a jiya Juma’a.

Dokar dai ba ta ambaci adadin shekarun da za a yi wa mace aure ba, shekarun da a baya aka sanya na faraway daga 16.

Kungiyar ta Taliban ta kuma ce daga yanzu za a bar matar da mijinta ya rasu ta sake yin aure makwanni 17 bayan mutuwar mijinta, zalika da kanta za ta zabi sabon mijin da take son aura.