Rasha ta tsagaita wuta a Ukraine domin bawa kiristoci damar bikin Kirismeti

Shugaba Vladmir Putin na kasar Rasha ya umarci hukumar tsaron kasar da ta dakatar da hare-haren da take kaddamar wa a Ukraine domin bawa mabiyar darikar Orthodox ta masu tsatssauran ra’ayi damar gudanar da nasu bukukuwan Kirismeti.

Shugaban Rasha Vladimir Putin kenan via REUTERS - SPUTNIK

Matakin na zuwa ne, bayan da shugaban Turkiyya Recep Tayyip Erdogan da shugaban addini na kasar Rasha Patriarch Kiril suka yi kira ga gwamnatin Rasha da ta dakatar da hare-haren ta a Ukraine.

Sanarwar da Fadar Kremlin ta fitar, ta ce an umarci sojoji su dakatar da kaddamar da hare-hare har tsawon sa’o’i 26, farawa da misalin karfe 12 na ranar 6 ga watan Janairu.

“Domin bawa mabiyar darikar Orthodoxy da ke da rinjaye a wuraren da muke kai hare-hare, muna kira ga sojojin Ukraine da su tsagaita wuta domin bawa Kiristocin damar zuwa coci a ranar jajiberen Kirismeti da kuma bikin ranar,” in ji sanarwar fadar Kremlin.

Shugaba Erdogan na Turkiya a wata tattanawa ta wayar tarho da takwaransa na Ukraine, Volodymyr Zelensky, ya ce gwamnatin Ankara a shirye take ta shiga tsakanin Rasha da Ukraine, domin dawo da zaman lafiya a tsakanin kasashen biyu.

Sanarwar da ofishin Erdogan ya fitar, ta ce Turkiyya ta mika tayin diplomasiyya da ta danganci kawo karshen takaddamar da ake y ikan cibiyar nukiliya ta Zaporizhzhia.