Gwamnatin Sudan za ta mika Omar al-Bashir ga kotun duniya

Gwamnatin Sudan ta ce za ta mika tsohon shugaban kasar Omar Hassan al-Bashir ga kotun duniya da ke Hague don ya fuskancin shari’a dangane da zarge-zargen aikata laifukan yaki da na cin zarafin bil’adama.

Tsohon shugaban Sudan Omar al-Bashir yayin fara fuskantar shari'a kan tuhume-tuhumen aikata laifukan Rashawa. 19 ga Agusta, 2019. Ebrahim HAMID AFP/File

Ministar harkokin wajen kasar ta Sudan Mariam al-Mahdi ce ta tabbatar da hakan ga babban mai shigar da kara na kotun Karim Khan da ke gudanar da ziyarar aiki a birnin Khartoum.

Mariam ta ce baya ga al-Bashir akwai wasu mutane biyu wato Ahmed Haroun tsohon gwamnan Kordafan ta Kudu da kuma tsohon ministan tsaro Abdl  Rahim Mohamed Hussein.

Tsohon shugaban Sudan Omar al-Bashir yayin shirin barin ofishin mai gabatar da kara a Khartoum, ranar 16 ga Yuni, 2019. REUTERS/Umit Bektas

Kotun duniya ta ICC dai ta shafe shekaru akalla goma tana neman tsohon shugaba al-Bashir mai shekaru 77 a duniya ruwa a jallo bisa zarginsa da kisan kare dangi, laifukan yaki da cin zarafin bil adama a yankin Darfur.

Majalisar Dinkin Duniya ta ce mutane dubu 300 aka kashe yayin da wasu miliyan 2 da dubu 500 suka rasa muhallansu a rikicin Darfur, wanda ya barke a yankin yammacin kasar cikin 2003.

Sojoji sun kifar da gwamnatin al-Bashir tare da tsare shi a watan Afrilun 2019 bayan watanni hudu ana zanga-zangar gama gari a duk fadin Sudan don adawa da mulkinsa.

Tun a shekarar 2009 kotun ta ICC ta bayar da sammacin kamo al-Bashir saboda laifukan yaki a Darfur, daga baya ta kara da kisan kare dangi a kan tuhumar.