'Yan tawayen Libya na garkuwa da bakin-haure

Hukumar kula da bakin haure a duniya ta bayyana takaicinta a game da wani hodon bidiyo da ke nuna yadda ‘yan tawayen Libya ke yin garkuwa da bakin haure domin samun kudaden fansa.

bakin haure a Libya AFP

Hoton bidiyon ya nuna wasu ‘yan ci rani daga kasashen Somalia da kuma Habasha su 260 a hannun wasu ‘yan tawaye da ke yankin kudancin Libya, kuma bidiyon ya nuna wasu daga cikinsu a zaune yayin da wasu ke kwance dukkaninsu a kasa, kuma ga alama sun tagayyara sakamakon yunwa.

A cikin bidiyon wanda wani dan jaridar kasar Turkiyya ya yada, daya daga cikin matasan da aka yi garkuwa da su yana kwance ne a kasa da kuma katon dutse an dora ma sa a baya.

An ji wannan matashi na cewa, an yi masa haka ne saboda ya gaza biyan dala dubu 8 a matsayin kudin fansa, inda ya ce an yi masa duka har ma an karya ma sa hannnu tare da cire ma sa haure, kafin daga bisani a dora masa dutse a doron bayansa.

Hukumar kula da bakin haure ta duniya ta ce wannan abin assha ne, lura da cewa ana tsare da mutanen ne a wani yanki da ba kungiyoyin agaji balanta wadanda za su shiga tsakani domin ceto mutanen da ake garkuwa da su.