An bankwado cogen wasa a Tennis

Badakalar cogen wasa ta kunno kai a wasan Tennis bayan Novak Djokovic zakaran Tennis din na duniya ya kwarmata cewa an taba tuntubarsa da kudi domin ya yi coge.

Dan wasan Tennis Novak Djokovic Reuters / Tony O'Brien

Yanzu haka kuma ‘yan wasan na Tennis da dama na ci gaba da fasa kwai a harakar ta cogen wasa.

Hukumomin Tennis da ‘yan sanda sun sa ido a wasannin Australian Open da ake gudanarwa a Melbourne yanzu haka kan badakalar cogen wasan da aka fara fallasawa a wasan.

Wannan dai sabon abu ne a sha’annin Tennis, yayin da ake fama da matsalar shan abubuwa masu sa kuzari a harakar wasanni.

Novak Djokovic ya ce a lokacin kuriciyarsa a wasan Tennis an taba ma shi tayin kudi dala dubu dari biyu domin ya yi coge a Rasha.