Brazil ta cire Antony daga cikin tawagarta saboda zargin cin zarafi

Kasar Brazil ta jingine dan wasan gaban Manchester United Antony sakamakon zargin cin zarafin tsohuwar budurwarsa.

Dan wasan ya musanta zarge-zargen da ake masa. Getty Images - Marvin Ibo Guengoer - GES Sportf

Hukumar kwallon kafa ta Brazil ta ce an cire dan wasan mai shekaru 23 daga cikin tawagar bayan da aka tabbatar mata cewar ana binciken sa.

'Yan sanda a Sao Paulo da Greater Manchester na gudanar da bincike kan zarge-zargen, wanda dan wasan ya musanta.

Ana zargin Antony da cin zarafin tsohuwar budurwar sa Gabriela Cavallin a wani dakin otal na Manchester a ranar 15 ga watan Janairu, daga bisani ya barta da rauni a ka, wadda har sai da ta kaita ga ganin likita.

Ta kuma yi ikirarin cewa dan wasan ya nausheta a kirji, wanda hakan ya yi sanadin lalacewar dashen mama da silicone da aka mata, kuma likitoci sun tabbatar mata da cewa sai an mata aiki a wurin.

Antony ya jaddada cewa a tarayyarsa da tsohuwar budurwar tasa bai taba cin zarafinta ba.

Zargin ya zo ne bayan da kungiyar ta Premier ta sanar a watan da ya gabata cewa dan wasan gaba Mason Greenwood zai suya sheka ta hanyar yarjejeniya bayan wani bincike na cikin gida na watanni shida da yake fuskanta.

A makon jiya ne dan wasan ya tafi zaman aro kungiyar Getafe ta kasar Spaniya.

Dan wasan gaba na Arsenal, Gabriel Jesus ne ya maye gurbin Antony a cikin tawagar Brazil a wasan neman gurbin shiga gasar cin kofin duniya da za su kara da Bolivia da Peru.