Ronaldo zai fafata da Manchester United a gasar Turai

Cristiano Ronaldo zai shiga fafatawar da Juventus za ta yi da Manchester United a watan gobe a Gasar Cin Kofin Zakarun Nahiyar Turai bayan an haramta masa wasa guda sakamakon jan katin da aka manna masa.

Cristiano Ronaldo bayan samun jan kati a wasan Juventus da Valencia Sergio Perez

Hukumar Kwallon Kafar Nahiyar Turai, UEFA ta haramta wa Ronaldo mai shekaru 33 buga wasan da Juventus za ta yi da Young Boys a ranar 2 ga watan Oktoba sakamakon wannan jan katin da aka ba shi a wasan da kungiyarsa ta yi nasara da kwallaye 2-0 akan Valencia a makon jiya.

Ronaldo ya samu katin ne bayan samun sa da laifin jan gashin dan wasan baya na Valencia Jeison Murillo, kuma a karon farko kenan da ake ba shi jan katin tun bayan soma taka ledarsa a gasar zakarun Turai.

A ranar 23 Juventus din za ta ziyarci Old Trafford don kece raini da Manchester United.