Jiragen yakin Turkiyya sun ci gaba da kai wa Kurdawa farmaki

Sojojin Turkiyya sun kai munanen hare-hare ta sama a yankin kudancin kasar, sa’o’i kadan bayan da wani harin bam ya kashe dakarun kasar 8 a jiya laraba.

Wasu mayakan PKK a kudancin Turkiyya AFP / SAFIN HAMED

Rahotanni sun ce jiragen yakin kasar sun fadada yankunan da suke kai wa hare-haren zuwa 13 inda mafi yawan mazaunansu Kurdawa ne.

Kungiyar ‘yan tawayen Kurdawa ta PKK ta ce ita ta dasa bam wanda ya tashi a lokacin da ayarin motocin sojin kasar ke wucewa a jiya, lamarin da ya haddasa mutuwar dakarun na gwamnati 8 da kuma raunana wasu da dama.

Gwamnatin Turkiyya dai ta tsananta kai hari akan yankunan Kurdawa a cikin wata daya, a daidai lokacin da kasar ke fuskantar wata barazanar tsaro daga mayakan kungiyar IS da ke ikirarin yin jihadi daga kasashen makotanta Iraki da Syria.