Majalisar Dinkin Duniya ta maido da ayyukanta a Rann

Ofishin bada agajin jinkai na Majalisar Dinkin Duniya OCHA, ya sanar da komawa bakin ayyukansa a garin Rann na jihar Borno da ke arewa maso gabashin Najeriya.

Wasu jami'an agaji na Majalisar Dinkin Duniya a filin jiragen sama na Maiduguri, yayin da suke janye ayyukansu daga garin Rann bayan harin Boko Haram, wanda uku daga cikinsu suka hallaka. Maris, 2, 2018. OCHA/Yasmina Guerda/REUTERS

Sai dai Ofishin na OCHA ya ce ma’aikatan nasa ba wai zasu rika kwana ba ne a garin na Rann ba, kamar yadda suke a baya, har sai an tabbatar da cikakken tsaro a yankin.

A ranar 2 ga watan Maris, Majalisar Dinkin Duniya ta janye ilahirin jami’anta daga garin na Rann, bayan Farmakin da mayakan Boko Haram suka kai ranar 1 ga watan, inda suka kashe mutane 8 ciki harda jami’an agaji 3 suka kuma sace ma’aikaciya jiyya 1.

Akalla mutane 80,000 jami’an agaji na majalisar Dinkin Duniya dana sauran kungiyoyi suke lura da su a garin na Rann da ke jihar Borno.