Kamfanonin sigari ne suka fi gurbata muhalli - WHO

Hukumar Lafiya ta Duniya ta bayyana kamfanonin taba sigari a matsayin manyan masu gurbata muhalli da kuma haifar da dumamar yanayi a duniya.

Masana kiwon lafiya sun ce, sigari na cutar da lafiyar dan Adam REUTERS/Jonathan Alcorn/Files

Hukumar ta zargi kamfanonin da haifar da sare dazuka da mamaye filayen da ake matukar bukata da kuma ruwa a kasashe matalauta da ake bukatar su domin yin noma da samar da abinci, yayin da suke fitar da robobi tare da sinadare masu guba da kuma miliyoyin tan na sinadarin ‘carbon dioxide’.

Rahotan Hukumar da aka fitar a wannan Talatar a daidai lokacin da ake bikin ranar yaki da shan taba ta duniya, ya bukaci dorawa kamfanonin sarrafa tabar alhakin tsaftacce muhallin da suke gurbatawa.

Hukumar ta ce kamfanonin sun yi sanadiyar asarar bishiyoyi miliyan 600 a duniya, yayin da ake amfani da eka dubu 200 na filaye wajen noma tabar da tan biliyan 22 na ruwa, a daidai lokacin da kamfanonin ke sanadiyar fitar da gurbatacciyar iskar ‘carbon dioxide’ tan miliyan 84 a duniya.