Isra'ila ta bada umarnin kwashe jama'a daga kudancin Gaza
Isra’ila ta bada umarnin kwashe karin jama’a daga yankin kudancin Gaza a daidai lokacin da jami’an diflomasiyya suka matsa kaimi wajen ganin an dakatar da yakin da kungiyar Hamas ta ce, ya yi sanadiyar mutuwar mutane dubu 20.
Wallafawa ranar:
Majalisar Dinkin Duniya ta ce, a jiya Laraba ne Isra’ilar ta bada umarnin kwashe jama’ar daga wasu yankuna masu fadi da ke birnin Khan Yunis, inda sama da mutane dubu 140 ke samun mafaka bayan sun rasa muhallansu.
A lokacin da yakin ke farko-farko, Isra’ila ta shaida wa fararen hula da su fice daga yankin arewacin Falasdinu da aka yi wa kawanya, tana mai kira a gare su da su nemi mafaka a yankunan da ke kudanci.
Sai dai a yanzu, wuraren da jama’a ke neman mafaka a cikinsu sun yi karanci, yayin da kasashen duniya ke ci gaba da fusata sakamakon karuwar alkaluman mamata.
Ofishin Yada Labarai na gwamnatin Hamas da ke Zirin Gaza ya bayyana cewa, akalla mutane dubu 20 ne aka kashe a yankin na Falasdinu tun bayan barkewar yakin da Isra’ila.
Hamas ta ce, akwai kananan yara dubu 8 da mata dubu 6 da 200 da suka rasa rayukansu a wannan yakin wanda aka fara shi a ranar 7 ga watan Oktoba bayan wani hari da Hamas ta kaddamar cikin Isra’ila da ya yi sanadiyar mutuwar mutane dubu 1 da 400.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da mu