An ceto sama da 'yan cirani 400 daga tekun Mediterranean
Wasu kungiyoyi masu zaman kansu na kasa da kasa sun ce sun yi nasarar ceto wasu ‘yan cirani 400 a gabar tekun Mediterranean bayan da jirgin da suke ciki ya nutse da su.
Wallafawa ranar:
Kungiyoyin da suka yi wannan aikin hadin gwiwar sun hadar da SOS Mediterranee da Sea Watch da kuma ResQship, inda suka ce jirgin su da ke aikin ceto a gabar ruwan ne ya yi nasarar ceto mutanen, bayan da suka hangi jirgin ‘yan ciranin da ke yunkurin tsallakawa turai ya fara tangal tangal a ruwa.
Ta cikin sakon hadin gwiwar da suka wallafa a shafin su na Twitter kungiyoyin sun ce sun ceto ‘yan ci ranin su 400, yayin da tuni aka mika su asibiti don fara karbar agajin gaggawa.
A cewar kungiyoyin wannan shine karo na uku cikin kwanaki uku da suka yi aikin ceto mutanen da ke yunkurin tsallakawa turai ta barauniyar hanya, wadanda kuma jirgin su ya kife a kan tekun.
Kungiyoyin suka ce cikin watanni shidan farko na wannan shekara mutane dubu 1 da 146 ne suka hallaka a tekun, a yunkurin su na tsallkakwa turai, yayin da kuma suka ceto mutanen dubu 30 da ran su.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da mu