Mahaukaciyar Guguwa ta kashe daruruwan mutane a Philippines

Akalla mutane kusan 500 aka ruwaito sun mutu wasu da dama kuma suka salwanta sakamakon bala’in guguwa da ruwan saman da a ka samu a kasar Philippines kamar yadda hukumomin kasar suka sanar.

Gawawwakin mutanen da suka mutu sakamakon baka'in guguwar Bopha da ta shafi Philippines REUTERS/Karlos Manlupig

A yankunan New Bataan an ruwaiton samun mutuwar mutane 258 wasu kuma kimanin 241 suka salwanta sanadiyar Guguwar da ake kira da sunan Bopha.

Haka kuma a yankin Davao an ruwaito mutuwar mutane 81.

Masana sun ce Wannan guguwar ita ce mafi karfi da ta afkawa kasar Philippines a bana kuma tana tafiya ne dauke da iska mai gudun kilomita 210 a duk sa’a daya.

Akalla mutane 43 suka mutu bayan zaizayar kasar da ta biyo bayan hakan, a kusa da wani sansanin sojin kasar, wasu mutane sama 20 suka samu raunuka.

Guguwar wacce tafi aukuwa a gabacin kasar ta, a cewar rahotanni, ta zo da ruwa da dama a yayin da ta yi ta tunbike bishiyoyi da rufin gidaje tare da katse wutan lantarki, wanda hakan ya yi sanadiyar ficewar mutane sama da 56,000 daga mahallinsu a yankin.

Bayanai sun nuna cewa, akalla jiragen sama kusan 150 guguwar ta hana tashi a yankin Mindanao, a yayin da fiye da mutane sama da 3,000 wadanda ke kokarin tafiya a jiragen ruwa ke jibge a tashar jiragen ruwa daban daban a yankin.

Wani mazaunin garin da ake kira Tagum, ya fadawa kamfanin Dillancin Labarai na AFP cewa wannan shi ne karo na farko da suka taba fuskantar irin wannan bala’i.