Sabon fada ya barke tsakanin Taliban da 'yan tawayen Panjshir
Rahotanni daga Afghanistan sun ce sabon fada ya barke tsakanin mayakan Taliban da na ‘yan tawayen da ke kiran kansu da NRF, a yankin kwarin Panjshir mai tsaunuka da ke arewa maso gabashin kasar.
Wallafawa ranar:
Sabon gumurzun na zuwa ne a yayin da kungiyar Taliban ke shirin kafa sabuwar gwamnati a Afghanistan bayan sake kwace iko da kasar a karo na biyu da ta yi.
Bayanai daga wasu majiyoyi sun ce da alama Taliban ta kuduri aniyar murkushe masu yi mata tawaye a yankin Panjshir ne kafin sanar da wanda zai jagoranci kasar bayan ficewar sojojin Amurka da na NATO, matakin da ya kawo karshen yakin shekaru ashirin da suka gwabza.
Sai dai mayakan ‘yan tawayen na NRF da ke Panjshir, yankin da ya shafe kusan shekaru goma yana fafatawa da dakarun tsohuwar Tarayyar Soviet, da kuma mulkin farko na Taliban daga shekarar 1996 zuwa 2001, na cigaba da tsayuwar gwamen Jaki dangane da kin mika wuya ga Taliban.
Rundunar ‘yan tawayen na Panjshir ta kunshi mayakan sa kai masu adawa da kungiyar Taliban da tsoffin jami'an tsaron Afghanistan, wadanda suka ja daga a yankin mai tsunuka da ke da nisan kusan kilomita 80 da arewacin birnin Kabul, a karkashin jagorancin tsohon shugaban Amrulla Saleh da Ahmad Massoud, dan Ahmad Sha Massoud, tsohon kwamandan da ya jagoranci yaki da tarayyar Soviet da kuma adawa da zangon farko na mulkin Taliban.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da mu