Jiragen yakin Syria sun kai hare-hare sama da 150 cikin awwani 24

Mazauna birnin Aleppo sun ce jiragen yakin Syria sun kaddamar da sabbin hare-hare sama da 150 cikin awanni ashirin da hudu da suka gabata, hakan kuma yayi sanadin rasa rayukan sama da mutane 90 a arewacin birinin.

Wasu mazauna birnin Aleppo sun ceto kananan yara daga karkashin baraguzan gine gine da suka rushe AMEER ALHALBI / AFP

Hare-haren da aka kaddamar a yau Juma’a, bangare ne na sabon yunkurin da gwamnatin Syria ta kaddamar, domin kwace yankunan da ke karkashin ikon ‘yan tawaye a birnin Aleppo.

Harin yayi sanadin lalata kayayyakin bada agajin gaggawa da ke yankin tare da lalata wuraren karkashin kasa da fararen hula suke amfani da su wajen fakewa hare-haren bam.

Rahotanni sun ce, cigaba da luguden wutar a birnin Aleppo yana dakile kokarin jami’an bada agaji, na ceto fararen hula da sabon fadan ya ritsa da su.