IMF za ta ba Jamhuriyar Benin rancen sama da dala miliyan 600

Majalisar zartaswar asusun bada lamuni na duniya IMF ta sanar da cewa ta amince ta bai wa kasar Jamhuriyar Benin rancen dala miliyan 638 don tsamo kanta daga matsalar tattalin arziki da yakin da ake yi a Ukraine da kuma annobar covid 19 suka janyo mata.

Patrice Talon Shugaban jamhuriyar Benin Sia KAMBOU / AFP

A wata sanarwa, asusun bada lamunin na duniya ya ce biyo bayan wannan shawarar ta majalisar  zartaswarsa, za a aike wa da Benin din dala miliyan 143  ba tare da bata lokaci ba.

Asusun ya yaba da ci gaban da Benin ta samu a fannin kanana da matsakaitan masana’antu, wanda ya ce shine ginshikin tattalin arzikin kowace kasa.