An gaza kawo karshen rikicin siyasar Jamhuriyar Congo
An gaza cinma matsaya a tattaunawar da aka yi a Jamhuriyar Dimokaradiyar Congo, tsakanin wakilan Jam’iyya mai mulki dana ‘yan adawa, domin kawo karshen rikicin siyasar kasar.
Wallafawa ranar:
A ranar Litinin mai zuwa wa’adin Shugaban kasar, Joseph Kabila zai kare, yayinda a gefe guda, yake neman yin tazarce, abinda ‘yan adawa suka ce ba zasu lamunta ba.
Rahotanni sun ce yanzu haka ana zaman dar dar a wasu sassan kasar, inda jami’an ‘yan sanda ke kafa shingayen bincike a wasu titunan babban birnin kasar Kinshasa, yayinda wasu jami’an tsaron ke sintiri yankunan da ke kusa da fadar gwamnati.
Jami’an Diflomasiya musamman na kasashen turai sun bukaci jama’arsu da ke kasar ta Jamhuriyar Congo su fice daga kasar, saboda fargabar barkewar rikici.
Sai dai kuma a wata zantawa da yayi da kamfanin dillancin labarai na Reuters, wani jagoran ‘yan adawa, Fellix Tshisekedi ya ce ba zasu gudanar da wata zanga-zanga ba, domin kada hakan ya jefa fareren hula cikin wani hali, sai dai suna kan matsayinsu na neman saukar shugaban kasar Joseph Kabila.
Gwamnatin Kabila na cigaba da kare matsayinta na cewa bazata iya shirya gudanar da babban zaben kasar ba har sai a shekara ta 2018,saboda dalilan rashin kudi.
A wani cigaban kuma, wakilai sun ce za’a cigaba da tattaunawa a ranar Laraba mai zuwa, bayan dawowar limaman darikar Katolika da ke shiga tsakani daga birnin Rome.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da mu