An kai harin Bom a ofishin jakadancin Italiya dake Masar

Yau Asabar mutum 1 ya rasa ransa, sakamakon wani Bom da ya fashe a ofishin jakadancin kasar Italiya dake birnin Alkahiran kasar Masar. Wakilin kamfanin dillancin labarun Faransa na AFP ya bayyana cewa fashewar, an dasa Bom a cikin wata mota da aka ajiye a kusa da ofishin, kuma lamarin yayi sanadiyyar lalacewa wani sashe na ofishin jakadancin. 

Shugaban kasar Masar, Abdel Fattah al-Sisi REUTERS/The Egyptian Presidency/Handout via Reuters

Jami’an kula da lafiya a wajen, sun ce fashewar da ta faru da misalin karfe 6 da rabi na safe agogon kasar ta Masar, tayi sanadiyar raunata wasu ‘yan sanda 2 dake kula da wurin.
Tuni hukumomin birnin Rome suka yi Allah wadai da harin, sai dai sun ce harin bai shafi dan kasar ta Italiya.