Liverpool za ta doka wasan karshe na Carabao ba tare da 'yan wasa 9 ba

Dai dai lokacin da Liverpool ke shirin karawa da Chelsea a wasan karshe na cin kofin kalubale ko kuma Carabao a ranar 25 ga watan nan Jurgen Klopp na fama da matsalar rashin zaratan ‘yan wasansa 9 wadanda ke jinyar rauni.

Masu sharhi na ganin zai yiwa Liverpool matukar wahala ta yi amfani da irin tawagar da ta kara da Luton a tsakiyar da mako wajen tunkarar Chelsea a ranar Lahadi. © AFP - OLI SCARFF

Cikin wadannan ‘yan wasa kuwa har da wadanda bisa al’ada Klopp ya saba amfani da su a dukkanin manyan wasanni wadanda suka kunshi mai tsaron raga lamba daya wato Alisson Becker da Mohamed Salah sai Trent Alexandre-Arnold da Darwin Nunez kana Dominik Szoboszlai.

Sai dai duk da wannan rashin ‘yan wasa Jurgen Klopp a wata zantawarsa da manema labarai ya ce ko kadan baya shakkar kowacce haduwa da kowacce kungiyaa kuma karkashin kowacce wasa, domin kuwa a cewarsa matukar ya na da ‘yan wasa 9 walau daga karamar tawaga ko babba wasa zai tafi yadda ya kamata.

Ana ganin dai rashin ‘yan wasan har guda 9 zai tilasta Klopp amfani da wani salo kwatankwacin Wanda ya yi amfani da shi a wasan Liverpool da Luton ta hanyar gina tawaga mai tattare da ‘yan wasa masu kananun shekaru wajen tunkarar Chelsea a karshen mako.

Ko a wasan na Larabar da ta gabata, anga yadda Klopp ya tattaro ‘yan wasa daga karamar tawagar Liverpool ciki har da Trey Nyoni mai shekaru 16 da aka hango a benci.

Masu sharhi dai na ganin zai yiwa Liverpool matukar wahala ta yi amfani da irin tawagar da ta kara da Luton a tsakiyar da mako wajen tunkarar Chelsea a ranar Lahadi lura da cewa Blue din ta fara farfadowa dai dai lokacin da Reds ke fama da rashin zakakuran ‘yan wasan.