Zakarun Turai: Ba a san maci tuwo ba sai miya ta kare

Yau Talata 13 ga watan Afrilu za a cigaba da fafatawa a gasar cin kofin zakarun Turai tsakanin kungiyoyi 8 a zagayen kwata final. 

Mai horas da kungiyar Chelsea tare da 'yan wasansa, bayan samun nasara kan FC Porto da 2-0, a zangon farko na matakin wasan kwata final. © Reuters

Wasannin da za a buga a yau din dai na matsayin zango biyu, bayan wadanda suka gudana a makon jiya.

Chelsea za ta fafata da FC Porto, inda za take fatan maimaita samun nasarar da ta yi a zagayen farko na doke Porto da 2-0.

'Yan wasan Bayern Munich da na PSG bayan kammala fafatawar zangon farko na zagayen kwata final a gasar Zakarun Turai, wanda PSG ta samu nasara da 3-2. AP - Matthias Schrader

Wasa na biyu da za a fafata kuma shi ne tsakanin PSG da Bayern Munich, wanda a zagayen farko PSG ce ta samu nasara da 3-2.

Wasan na yau tsakanin PSG da Bayern Munich dai zai dauki hankali, la’akari da cewar dukkaninsu ba kanwar lasa bane, la’akari da bajintar da suka nuna a bana, da kuma gasar Zakarun Turan ta bara da suka fafata a wasan karshe, inda Munich ta samu nasara da 1-0.