Liverpool ta koma gurbinta na Jagora a Firimiya

Liverpool ta koma matsayinta na jagora a teburin gasar bayan lallasa Cardiff City da kwallaye 2 da banza, inda yanzu ta ke da maki 88 tazarar maki 2 tsakaninta da Manchester City, ko da dai Cityn na da wasa guda a hannu.

Roberto Firmino da Naby Keita bayan nasararsu kan Cardiff City da kwallaye 2 da banza Action Images via Reuters/Carl Recine

Kwallayen biyu da Wijnaldun da kuma James Milner suka zura a ragar Cardiff din ne ya bai wa Liverpool damar komawa matsayinta, bayan da a ranar asabar City ta samu zarafin hayewa saman teburi sakamakon lallasa Tottenham.

A larabar makon nan ne dai Liverpool za ta fayyace idan za ta iya dage kofin a bana ko akasin haka, wato bayan wasan Manchester City da Manchester United.

Matukar dai City ta gaza lallasa United a wasan na ranar Laraba to da alama fa Liverpool za ta kawo karshen dakonta na tsawon shekaru 29 don lashe kofin na Firimiya.