Firai Ministan Faransa ya biya kudin da ya kashe a kallan kwallo

Firai ministan Faransa, Manuel Valls ya rubuta takardar karban kudi a banki wato Cheque har na Euro 2,500 domin biyan gwamanati abinda da ya kashe a tafiyar kallan kwallon kafa a Jamus.

Firai Ministan Faransa Manuel Valls Reuters/Regis Duvignau

Valls ya yi amfani da jirgin sama na gwamanti zuwa birnin Berlin inda ya kalli wasan karshe tare da 'ya'yansa biyu tsakanin Barcelona da Juventus a gasar cin kofin zakarun nahiyar Turai, lamarin da ya haifar masa da suka daga ‘yan kasar lura da cewa tafiyar ta shi ce, ba ta gwamnati ba.

A cewar Valls, masoyin Barcelona, Shugaban hukumar kwallon kafa ta nahiyar Turai ne, Michel Platini ya gaiyace shi domin tattauna yadda za a gudanar da gasar cin Kofin Turai ta shakera mai zuwa da za a yi a Faransa.

Amma duk da wannan bayanin da ya yi, bai sa ya kubuta daga caccakar da ake masa ba, lamarin da ya sa ya yi alkawarin biyan gwamanatin kasar wannan kudin.