Masu adawa da auren jinsi sun yi zanga-zanga a Faransa

Shi dai wannan daftarin doka da ke halasta auren jinsi a Faransa tuni ya samun amincewar karamar Majalisar dokokin kasar da gagarumin rinjiye, kuma a cikin watan Afrilu mai kamawa ne za a gabatar da shi a gaban ‘yan majalisar dattawa domin neman samun tasu amincewar.

Shugaban Faransa, François Hollande REUTERS/Eric Vidal

Ta la’kari da yadda daftarin ya sami amincewar karamar majalisa rokokin ba tare da wata gardama ba, wannan ya sa masu zanga-zangar suka yi hasashen cewa ko shakka babu dokar za ta sami gagarumin rinjiya hatta ma a cikin majalisar dattawan.
Masu zanga-zangar dai sun rika furta zafafen kalamai a kan gwamnatin ‘yan gurguzu da ke mulkin kasar, tare kuma da zarginta da kasa yin wani katabus dangane da matsalar rashin aiki da ta addabin al’umma, inda a maimakon ta tunkari irin wadannan matsaloli, sai gwamnatin ta shiga kirkiro dokokin marasa amfani ga jama’a a cewarsu.

Tun da farko dai ‘yan sanda ne suka haramta wa masu shirya zanga-zangar izinin shiga har a cikin fadar shugaban kasar ta Elysee saboda a cewarsu hakan zai iya kawo cikas ga kwanciyar hankalin jama’a, to amma dai duk da haka wadanda suka shiga zanga-zangar, sun yi cincirindo a gaban Elysee suna cewa mu aiki mu ke bukata amma ba dokar halasta auren jinsi ba.

Shi dai shugaban kasar ta Fransa Francois Hollande, a lokacin yakin neman zaben shugabancin kasar, duk da cewa bai ambaci kalmar auren jinsi ba, to amma dai ya rika cewa, ‘’auren domin kowa da kowa’’.