Nijar ta umarci sojojinta da su zauna a cikin shirin ko-ta-kwana

Sojojin da suka yi juyin mulki a Jamhuriyar sun bukaci dakarun kasar da su zauna cikin shirin ko-ta-kwana domin tinkarar duk wani hari da ake iya kai musu daga kasashen ketare sakamakon karuwar barazanar da kasar ke fuskanta. 

Sojojin Jamhuriyar Nijar yayin atasaye a garin Agadez. 435th Air Expeditionary Wing Pub - Staff Sgt. Devin Boyer

Kamfanin dillancin labaran Reuters yace wata sanarwar sojin da ake ta yadawa a kafofin sada zumunta ta ce daukar matakin ya zama wajibi domin kare kasar da kuma kaucewa yiwa sojojin ba-za-ta. 

Kungiyar ECOWAS ta dade tana cewa a shirye take ta yi amfani da karfin soji domin mayar da mulkin fararen hula a Nijar muddin sojojin da suka yi juyin mulki suka ki bada kai. 

Shugaban gudanarwar kungiyar Oumar Torey ya shaidawa manema labarai a jiya juma’a cewar babu wani shiri na mamaye Nijar ko kuma abkawa mutanen ta, yayin da ake ci gaba da daukar matakan diflomasiya domin warware matsalar.