Najeriya: Mutane 30 sun kone kurmus a wani hadarin mota a hanyar Kaduna

Rahotanni daga Najeriya na cewa Mutane 30 ne suka kone kurmus yayin da wasu motoci uku suka yi taho-mu-gama a kan wata babbar hanya a jihar Kaduna da ke arewa maso yammacin kasar, kamar yadda wani jami'in kiyaye haddura ya bayyana a ranar Juma'a.

Wani hadarin mota da ya hallaka mutane a Najeriya. Daily Post

Wani jami’in hukumar kiyaye hadurra ta tarayya a gundumar Zariya Abdurrahman Yakasai ya bayyana cewa, hatsarin ya afku ne a ranar Alhamis din da ta gabata yayin da wasu motocin bas guda biyu da wata karamar mota suka yi karo da juna a kauyen Hawan Mai Mashi da ke kan babbar hanyar Kano Kaduna zuwa Abuja babban birnin kasar.

Yakasai ya shaidawa RFI-Hausa cewa, Motocin guda uku kama da wuta ne bayan sun yi karo da juna, inda mutane 30 suka kone kurmus.

Hakazalika wasu fasinjoji da dama sun jikkata a hadarin, in ji shi.

“Sauran fasinjojin sun samu munanan raunuka kuma jami’an mu sun kai su asibiti, inda ake kula da su,

” inji shi.

Yakasai ya dora alhakin hatsarin kan gudu da kuma tukin ganganci.

Yawaitan Hadurra

Hatsarin mota ya zama ruwan dare a kan titunan Najeriyar da ba su da kyau da kuma rashin mutunta dokokin hanya.

A watan Fabrairu, mutane 18 ne suka rasa rayukansu a lokacin da wata mota ta yi taho-mu-gama da wata bas din fasinja a arewa maso gabashin jihar Yobe.

A shekarar da ta gabata dai an samu hadurran kan tituna har sau 10,637 a Najeriya, lamarin da ya yi sanadin mutuwar mutane 5,101 tare da raunata mutane 30,690, kamar yadda alkaluman hukumar kiyaye hadurra suka nuna.

Zaku iya latsa alamar sauti domin sauraron Abdurrahman Yakasai.