Najeriya ta samu 'Yan gudun hijira miliyan guda a shekara guda

Hukumar Kula da ‘Yan gudun hijira da kuma mutanen da suka rasa matsugunin su a Najeriya tace ‘Yan kasar sama da miliyan guda suka rasa matsugunan su a cikin shekara guda sakamakon tashe tashen hankula.

Shugaban Najeriya Muhammadu Buhari © Nigeria presidency

Kwamishiniyar dake kula da Hukumar Imaan Suleiman Ibrahim ta bayyana haka inda take cewa ya zuwa wannan lokacin mutanen da suka rasa matsugunan su a fadin kasar sun kai miliyan 3.

Shugabar hukumar tace Najeriya zata karbi ‘Yan gudun hijira 73,000 daga kasashe 23 a shekara mai zuwa, yayin da zata kwaso ‘Yan Najeriya 500,000 da suka makale a kasashen Libya da Chadi da Nijar da Kamaru da kuma Mali.

Imaan Ibrahim tace hukumar ta na shirin gina matsugunan ‘Yan gudun hijira a Jihohin Borno da Kano da Edo da kuma Katsina, yayin da aka cire Zamfara saboda matsalar da aka samu wajen samun fili.