Yariman Jordan ya auri 'yar kasar Saudi Arabia

Yariman Jordan Hussein bin Abdullah yau ya auri wata masaniya zaiyane zaiyanen kasa ‘yar kasar Saudi Arabia, Rajwa Al Saif a wani kasaitaccen bikin da akayi wanda ya samu halartar ‘yan gidan sarauta daga sassan duniya. 

Ango da amarya yayin da suke gaisawa da jama'a © reuters

An dai gudanar da wannan bikin ne a fadar Zahran dake birnin Amman ta kasar Jordan, inda aka saba gudanar da bukukuwan auran da suka shafi iyalan masarautar Hashemite, ciki harda auran Sarki Abdallah na biyu da Sarauniya Rania da kuma wanda mahaifinsa Sarki Hussein bin Talal yayi. 

Yarima Hussein da amaryarsa Rajwa © reuters

An daura auran Yarima Hussein da Rajwa Al Saif wadanda ke da shekaru 28 a gaban ‘yan uwa da kuma baki 140, cikin su harda uwargidan shugaban Amurka, Jill Biden da Yariman Birtaniya da na Wales. 

Yariman Wales William da mai dakinsa Kate, yayin da suke tattaunaw ada amarya da angon. © reuters

Mahaifin angon, wato Sarki Abdallah mai shekaru 61 a duniya, ya hau karagar mulki ne tun daga shekarar 1999, kuma yana ta kokarin horar da ‘dansa Hussein wajen dabarun mulki da kuma halartar tarurruka da shi, domin ganin ya gaje shi. 

Ango da mahaifinsa sarkin Jordan a Amman © reuters

Yarima Hussein ya zama mai jiran gado ne tun daga shekarar 2009 bayan mahaifinsa ya karbe mukamin daga ‘dan uwansa Hamzah a shekarar 2004, shekarar da aka zarge shi da yunkurin yiwa Abdallah juyin mulki. 

Yadda makada ke nishadantar da jama'a © reuters

Cikin wadanda suka halarci bikin na yau harda Sarkin Netherlands, Willem-Alexander da Sarauniya Maxima da kuma Sarkin Belgium Philippe da Gimbiya Elizabeth da kuma Yarima Frederick da Gimbiya Mary. 

Sarki Abdullah na II tare da sarauniya Rania lokacin da suke gaisawa da mai dakin shugaban Amurka, Jill Biden tare da 'yarta Ashley Biden. © reuters

A shekarar da ta gabata, Hussein yayi watsi da sarautar Yarima, bayan ya bayyana cewar manufofin da yake rike da su sun sabawa masarautar ta Jordan.