Kasashen duniya sun yi tir da harin Barcelona
Shugabannin Kasashen duniya na ci gaba da aikewa da sakwannin jaje ga gwamnatin Spain kan harin ta’addancin da kungiyar ISIS ta dauki alhakin kaiwa a birnin Barcelona, abin da ya yi sanadiyar mutuwar mutane 13 baya ga 100 da suka jikkata.
Wallafawa ranar:
Rahotanni sun kuma ce, wasu mutane 7 sun jikkata lokacin da wasu 'yan ta’adda suka kai hari a Cambrils mai tazaar kilomita 120 daga Barcelona a yau juma’a, amma an harbe maharan guda 5 har lahira.
Shugaban Rasha Vladmir Putin ya bukaci kasashen duniya da su zage dantse a yaki da ta’addanci, yayin da takwaransa na Faransa Emmanuel Macron ya ce, suna tare da Spain 100 bisa 100.
Ita ma, shugabar gwamnatin Jamus, Angela Merkel ta yi alla-wadai da harin na Barcelona, in da ta jajanata wa mutanen Spain.
Tuni dai aka cafke wasu da ake zargi da hannu a harin kamar yadda hukumomin kasar suka tabbatar.
An dai kai harin ne a unguwar Las Ramblas mai cike da hada-hadar jama’a musamman bakin masu yawon bude ido .
Ba a karon farko kenan ba da ‘yan ta’adda ke amfani da motoci wajen kai hari a kasashen Turai.
Sannan kuma 'yan ta'adda sun kai hare-hare da dama a kasashen na Turai a cikin wannan shekarar.
A ranar 3 ga watan Agusta, wasu mahara 3 sun kai hari a gadar London, in da suka daba wa mutane wuka, tare da hallaka mutane 8 da raunana 48.
A ranar 22 ga watan Mayu, wani dan kunar bakin wake ya kashe mutane 22 da raunana 59 a wajen bikin rawar da aka shirya a Manchester na Ingila.
A ranar 7 ga watan Afrilu, wani ya tuka motar daukar kaya cikin kasuwa a Stockholm na Sweden, in da ya kashe mutane 5 ya kuma raunana 15.
A ranar 22 ga watan Maris, wani ya daba wa dan sanda wuka a kusa da Majalisar Birtaniya, bayan wata mota ta afka wa matafiya a gefen hanya kusa da Westminster. Mutane 6 suka mutu, 20 kuma suka jikkata.
LabaranSamun Labaran RFI, Hirarraki, Rubattattuun Labarai, Labarai game da wani, shirye-shirye.
Hulda da mu