An kaiwa Firaministan Yemen Basindawa harin kisa

Firaministan kasar Yemen, Mohammed Basindawa, ya tasallake rijiya da baya lokacin da wasu ‘Yan bindiga suka bude wa tawagar motarshi wuta a cikin Sanaa a dai dai lokacin da yake kan hanyarsa ta zuwa gida.

Wani jami'in tsaro a yankin Sanaa da aka kaiwa Firaminista Mohammed Basindawa hari REUTERS/Khaled Abdullah

Kamfanin dillancin labaran Faransa, ya ruwaito cewar, ‘yan bindigan guda hudu sun bude wuta ne akan tawagar dake wucewa a tsakiyar birnin, sai dai babu wanda yaji rauni a ciki.

Wannan shine karo na farko da aka kaiwa shugaban hari, wanda ke jagorantar ‘yan adawa a karkashin gwamnatin Shugaba Ali Abdullah Saleh.

Kuma tarihi ya nuna cewa an jima ana kaiwa mambobin gwamnatinshi harin kisa a baya.